WATUMISHI SEKRETARIETI YA MAADILI WAASWA KUFANYA KAZI KWA WELEDI

Watumishi wa Ofisi ya Rais, Sekretarieti ya Maadili ya Viongozi wa Umma  wamesisitiwa kufanya kazi kwa weledi kwa kuzingatia maadili  bila kuyumba au kuyumbishwa  katika shughuli zao za kila siku.

Hayo yemesemwa na  Kamishna wa Maadili Mhe. Jaji (Stahiki) Sivangilwa Mwangesi wakati akifungua mkutano wa Baraza la Wafanyakazi wa Ofisi ya Rais, Sekretareiti ya Maadili ya Viongozi uliofanyika Makao Makuu ya ofisi hiyo jijini Dodoma tarehe 12 Machi, 2025.

‘’Tusikubali kuyumba au kuyumbishwa na hatimaye kutolewa kwenye mstari, tuendelee kufuata misingi ya weledi na maadili katika utendaji kazi kwa kuepuka rushwa na kushinda vishawishi   na tamaa nyinginezo,’’alisema Mhe. Mwangesi.

Jaji Mwangesi, ambaye pia ni Mwenyekiti wa Baraza hilo ameongeza kuwa kwa kukubali kuwa mtumishi wa Sekretarieti ya Maadili ya Viongozi wa Umma, basi ni lazima uwajibike kwa  kuzingatia nidhamu, uaminifu, uwazi na kupendana.

"Kwa mara nyingine niwakumbushe  kuwa tunatakiwa kuwajibika kwa kuzingatia nidhamu, uaminifu, uwazi na kupendana na yeyote atakayeenda tofauti na hayo, atakuwa si miongoni mwetu na hatutasita kuchukua hatua stahiki dhiki yake," alisisitiza Jaji Mwangesi.

 Katika hatua nyingine Jaji Mwangesi amewakumbusha  baadhi ya watumishi wenye changamoto za kiuadilifu na kuwakumbusha  kuhakikisha kuwa wanakua mstari wa mbele katika   kuzingatia uadilifu na kufanya kazi kwa uzalendo.

‘’Ninafahamu kuna baadhi yetu wana changamoto za kiuadilifu katika utendaji wao, lakini kwakuwa Taasisi yetu tunayoitumikia ni ya kimaadili basi hatuna budi kukumbushana kwa lengo la     kujipa muda kujitathmini na kujirekebisha kwenye suala la uaminifu, nidhamu, kupendana pamoja na utii kwa mamlaka na viongozi waliopo juu yetu," aliongeza.

Aidha, Jaji Mwangesi amewataka wajumbe wa Baraza hilo kuwa mabalozi kwa watumishi wengine kwenye suala la ujazaji wa majukumu katika mfumo wa e-utendaji ikiwa ni utekelezaji wa maelekezo ya Serikali.